काठमाडौँ, ५ भदौ । क्रिकेटको फेन्चाइज प्रतियोगिता नेपाल प्रिमियर लिग (एनपिएल)को दोस्रो संस्करण आगामी १ मंसिरदेखि हुने भएको छ । प्रतियोगिता २७ मंसिरसम्म चल्ने नेपाल क्रिकेट संघ (क्यान)ले जनाएको छ ।

एनपिएलका लागि खेलाडीको मिनीअक्सन गत २४ साउनमा सम्पन्न भइसकेको छ । मिनी अक्सनबाट ३७ खेलाडी विभिन्न ८ टोलीमा आबद्ध भएका छन् । ‘ए’ श्रेणीका ४ खेलाडीका लागि अधिकतम मूल्य लागेको थियो । आदिल अन्सारी, पवन सर्राफ, देव खनाल र अर्जुन साउद १५–१५ लाख रुपैयाँमा बिक्री भएका थिए ।

एनपिएलको पहिलो संस्करण २०८१ मंसिर १५ देखि ६ पुससम्म भएको थियो । पहिलो सिजनको उपाधि फाइनलमा सुदूरपश्चिम रोयल्सलाई हराउँदै जनकपुर बोल्ट्स्ले जितेको थियो ।

एनपिएलमा जनकपर र सुदूरपश्चिमसँगै कर्णाली याक्स, लुम्बिनी लायन्स, पोखरा एभेन्जर्स, चितवन राइनोज, काठमान्डु गोर्खाज र विराटनगर किङ्स सहभागी हुनेछन् ।

हरेक टोलीमा कम्तीमा ४ र बढीमा ६ विदेशी खेलाडी आबद्ध गर्न पाउने प्रावधान छ । अघिल्लो संस्करणमा भारतका शिखर धवनदेखि न्युजिल्यान्डका जिमी निसमसम्मले खेलेका थिए ।

एनपिएलको दोस्रो संस्करणको तयारी स्वरूप कीर्तिपुरस्थित त्रिभुवन विश्वविद्यालय क्रिकेट मैदानको स्तरोन्नति भइरहेको छ । हाल प्याराफिट निर्माण भइरहेको छ ।