हेटौँडा, २१ साउन । नेपाली कांग्रेस संसदीय दलका नेता इन्द्रबहादुर बानियाँ बाग्मती प्रदेशको मुख्यमन्त्रीमा नियुक्त भएका छन् । प्रदेशप्रमुख दीपकप्रसाद देवकोटाले मंगलबार संविधानको धारा १६८ को उपधारा (२) बमोजिम उनलाई मुख्यमन्त्रीमा नियुक्त गरेका हुन् ।

मकवानपुरको तत्कालीन हर्नामाडी गाविस–४ दियावतीमा २०२७ भदौमा जन्मिएका बानियाँ बागमती प्रदेशको छैटौँ मुख्यमन्त्रीका रूपमा नियुक्त भएका हुन् । यसअघि डोरमणि पौडेल, अष्टलक्ष्मी शाक्य, राजेन्द्र पाण्डे, शालिकराम जम्कट्टेल र बहादुरसिंह लामा तामाङ प्रदेशको मुख्यमन्त्रीमा नियुक्त भएका थिए ।

कांग्रेसको भ्रातृ संगठन नेपाल विद्यार्थी संघको राजनीति गर्दै मूल पार्टीको राजनीतिमा होमिएका बानियाँ कांग्रेसको बागमती प्रदेशका सभापति थिए । २०४४ सालमा राजनीतिमा प्रवेश गरेका बानियाँ २०५१ सालमा नेपाली कांग्रेसको महाधिवेशन प्रतिनिधि चुनिएका थिए ।

२०५२ सालमा नेपाल विद्यार्थी संघको जिल्ला सहसचिव हुँदै २०५५ सालमा तरुण दलको जिल्ला सचिव र २०५६ सालमा तरुण दलको जिल्ला सभापति भएका थिए । २०५८ सालमा कांग्रेस मकवानपुरका जिल्ला कार्यसमिति सदस्य भएका बानियाँ २०७३ चैत १२ मा नेपाली कांग्रेस मकवानपुरको सभापतिमा निर्वाचित भएका थिए ।

२०७८ मंसिरमा भएको कांग्रेस बागमती प्रदेश अधिवेशनबाट प्रदेश सभापतिमा बानियाँ निर्वाचित भएका थिए । २०७० सालको दोस्रो संविधानसभा निर्वाचनमा मकवानपुर क्षेत्र नं १ बाट निर्वाचित ५२ वर्षीय बानियाँ २०७४ सालमा संस्कृति, पर्यटन तथा नागरिक उड्डयन राज्यमन्त्री र गृहराज्यमन्त्रीमा नियुक्त भई काम गरिसकेका छन् ।

२०७४ मा मकवानपुर क्षेत्र नम्बर २ (ख) बाट प्रदेशसभा सदस्यमा निर्वाचित भएका बानियाँ सर्वसम्मत कांग्रेस बागमती प्रदेश संसदीय दलको नेता चुनिएका थिए । २०७९ सालको प्रदेशसभा निर्वाचनमा सोही क्षेत्रबाट निर्वाचित भए पनि उनी संसदीय दलका नेतामा बहादुरसिंह लामा तामाङसँग पराजित भएका थिए ।

यही ९ साउनमा संसदीय दलका नेता लामाविरुद्ध दर्ता भएको अविश्वासको प्रस्ताव पारित भएपछि संसदीय दलको नेताको पद रिक्त भएको थियो । रिक्त दलको नेता चयनका लागि १४ साउनमा भएको निर्वाचनमा २२ मत ल्याएर बानियाँ दलको नेतामा निर्वाचित भए । लामाले १४ मत मात्र प्राप्त गरेका थिए भने १ मत बदर भएको थियो ।

बानियाँ दलको नेतामा निर्वाचित भएपछि पार्टी सभापति शेरबहादुर देउवाको निर्देशनमा मुख्यमन्त्री लामाले पदबाट राजीनामा दिएका थिए । यसपछि बानियाँ मुख्यमन्त्री नियुक्त भएका हुन् । उनी राजनीतिसँगै निर्माण व्यवसायीका रूपमा पनि परिचित छन् ।

८ मन्त्री नियुक्त

बाग्मती प्रदेशका नवनियुक्त मुख्यमन्त्री बानियाँले मंगलबार नै ८ जना मन्त्री नियुक्त गरेका छन् । सत्ता साझेदार दल नेकपा (एमाले) का ६ र कांग्रेसबाट २ गरी ८ जनालाई मन्त्रीमा नियुक्त गरेका हुन् ।

एमालेका मधुसुदन पौडेल कृृषि तथा पशुपक्षी विकासमन्त्री, डा.दिनेशचन्द्र देवकोटा भौतिक पूर्वाधार विकासमन्त्री, जयराम थापा श्रम रोजगार तथा यातायातमन्त्री, भरतबहादुर केसी वन तथा वातावारणमन्त्री, किरण थापा स्वास्थ्यमन्त्री र विन्दु श्रेष्ठ उद्योग, वाणिज्य, भूमि तथा प्रशासनमन्त्रीमा नियुक्त भएका हुन् ।

यस्तै कांग्रेसबाट कृष्णकुमार तामाङ खानेपानी, ऊर्जा तथा सिँचाइमन्त्री र शिवराज अधिकारी विनाविभागीय मन्त्रीमा नियुक्त भए । नवनियुक्त मन्त्रीहरूलाई मंगलबार नै प्रदेश प्रमुख देवकोटाले पद तथा गोपनीयताको शपथग्रहण गराए ।