काठमाडौँ, १७ साउन । दिव्य पशुपतिनाथ अभियानअन्तर्गत शनिबार कलाकर्मीहरूले पशुपतिनाथ मन्दिर परिसरमा सरसफाइ गरेका छन् । ‘एक वर्ष एक संकल्पः स्वच्छता र हरियालीमा दीर्घकालीन परिवर्तन’ भन्ने उद्घोषसहित यही साउन ६ गतेदेखि अभियान सुरु भएको थियो ।

‘क्लाइमेट स्मार्ट सिटिज’ सँगको सहकार्यमा मैनादेवी फाउन्डेसनद्वारा सुरु गरिएको अभियानअन्तर्गत शनिबार नेपाल आइडल विजेता रवि ओड, लोक देउडा गायकहरू चक्र बम, टंक तिमिल्सेना, चेतन बोहोरा, लालबहादुर धामी, अनिता चलाउने, हाँस्यकलाकार हेमराज अधिकारीलगायतले मन्दिर परिसरमा सफाइ गरेको फाउन्डेसनका अध्यक्ष केपी खनालले जानकारी दिए ।

बढ्दो प्लास्टिक फोहोर व्यवस्थापन, वातावरण संरक्षण र हरियाली प्रवद्र्धन गर्ने उद्देश्यका साथ सुरु भएको अभियानमा समाजका सबै क्षेत्रका व्यक्तिहरूलाई सरिक गराउने नीतिअनुसार शनिबार सुदू्रपश्चिमका चर्चित कलाकारले सफाइ गरेको उनले बताए ।

कार्यक्रममा क्रिएसन नेपाल, फाउन्डेसनका स्वयम्सेवक र सेन्ट लरेन्स कलेजका विद्यार्थीको समेत सहभागिता रहेको थियो । त्यस क्रममा ३०० किलोग्रामभन्दा बढी फोहोर संकलन भएको थियो । फोहोरमा प्रायः चुरोट, गुट्खा र चक्लेटका खोल तथा मेडिकल सामग्रीलगायत भेटिने गरेको अभियान्ता फाउन्डेसनका अध्यक्ष खनालले जानकारी दिए ।

‘विश्वका हिन्दूहरूको आस्थाको केन्द्र पशुपतिनाथ क्षेत्र फोहोर हुनुले नेपालकै छविमा नराम्रो सन्देश जान्छ । त्यसैले फोहोर व्यवस्थापनका लागि अभियान सुरु गरेका छौँ, यो निरन्तर जारी रहनेछ । यसमा सबैको सहयोग र सहभागिताको अपेक्षा गरेका छौँ,’ उनले भने ।

यही साउन ६ गते संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले अभियान शुभारम्भ गरेका थिए ।