काठमाडौँ, १० साउन । नेपाल ललितकला प्रज्ञा–प्रतिष्ठानका संरक्षक तथा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले शुक्रबार प्रतिष्ठानका कुलपति, उपकुलपति, सदस्य सचिव तथा प्राज्ञपरिषद् सदस्यहरूसँग ललितकलाका विविध विषयसँगै क्षेत्रगत विषयमा छलफल गरेका छन् ।

मन्त्री पाण्डेले हालको कार्यसमितिको दुई वर्षे कार्य विवरण उत्साहजनक रहेको बताउँदै मन्त्रालयसँग सम्बन्धित सबै कुरामा सहयोग तथा सहजीकरण गर्ने आश्वसन दिए । उनले संस्कृतिको क्षेत्रसँग सम्बन्धित रहेर कार्य गर्ने निकायबीच समन्वय र सहकार्य हुनेपर्नेमा जोड दिए ।

प्रतिष्ठानका कुलपति नारदमणि हार्तम्छालीले प्रतिष्ठानको ऐन समयानुकुल परिवर्तनका लागि मन्त्रालयले सार्थक पहल गर्नुपर्ने बताए । उपकुलपति लालकाजी लामाले सांस्कृतिक सम्पदाको मूल्य ललितकलाले नै स्थापित गरेकाले यसको सर्वाङ्गीण विकासका लागि यसबाट प्राप्त रोयल्टीको निश्चित रकम यसै क्षेत्रको विकासका लागि छुट्याउनुपर्ने धारणा राखे ।

छलफलमा प्रतिष्ठानका सदस्य सचिव देवेन्द्रकुमार काफ्ले ‘थुम्केली’ले प्रतिष्ठानले दुई वर्षको अवधिमा सम्पन्न गरेका कार्य, त्यसको परिणाम तथा आगामी दिनको कार्यक्रमबारे मन्त्री पाण्डेलाई जानकारी गराउँदै नेपाली ललितकलाको क्षेत्रको अवधारणा, विकास, उत्थान, प्रवद्र्धनका लागि गरिनुपर्ने कानूनी, रणनीतिक, कार्यक्रम तथा योजनागत कार्यहरूको चर्चा गरेका थिए ।

छलफलमा परम्परागत चित्रकला विभाग प्रमुख पाल्साङ्मो लामा, वास्तुकला तथा लोककला विभाग प्रमुख प्रदीप अधिकारी, बहुआयामिक तथा अन्य सिर्जनात्मक (बहुआयामिक) कला विभाग प्रमुख सौरगंगा दर्शनधारी, मूर्तिकला विभाग प्रमुख दिनेश्वर महतो, समसामयिक चित्रकला विभाग प्रमुख संजय वान्तवा, शिल्प–हस्तकला विभाग प्रमुख अरुणा हिङमाङ, प्रतिष्ठानका उपप्रशासन प्रमुख कमलमणि काफ्लेलगायतको पनि उपस्थिति थियो ।