काठमाडौँ, ५ भदौ । नेपाल प्रहरीका प्रहरी निरीक्षक (इन्सपेक्टर) दिनेश गुरुङ पक्राउ परेका छन् । गुरुङकी पूर्वपत्नीको जाहेरीमा जिल्ला प्रहरी परिसर ललितपुरको टोलीले गुरुङलाई पक्राउ गरेको हो ।

गुरुङविरुद्ध जबरजस्ती करणी तथा ज्यान मार्ने उद्योगको मुद्धा परेको छ । प्रहरी प्रधान कार्यालय, नक्सालको १ नम्बर गणमा कार्यरत गुरुङलाई थुनामा राखिएको परिसरका प्रहरी उपरीक्षक (एसपी) चक्रराज जोशीले जानकारी दिए ।

यसअघि पूर्वपत्नी शुभद्रा दाहालले इन्स्पेक्टर गुरुङमाथि जबरजस्ती करणी र ज्यान मार्ने उद्योगको जाहेरी दिएकी थिइन् । इन्स्पेक्टर गुरुङले साउन ३० गते बेलुका महालक्ष्मी–४ इमाडोलस्थित आफ्नो निवासमै आएर कुटपिट तथा जबरजस्ती करणी उद्योग गरेको दाहालको जाहेरीमा उल्लेख छ ।

जाहेरी दर्तासँगै गुरुङलाई जिल्ला अदालत ललितपुरबाट ५ दिन थुनामा राख्न अनुमति लिएर अनुसन्धान थालिएको जिल्ला प्रहरी परिसर ललितपुरका एसपी जोशीले बताए ।

दाहालले आफूमाथि आक्रमण तथा जबरजस्ती करणी उद्योग भएको भन्दै सामाजिक सञ्जालमै रक्ताम्य फोटो पोस्ट गरेकी थिइन् । आफूमाथि पूर्वपतिले हिंसा गर्दै आएको दाहालले बताउने गरेकी थिइन् ।

इन्स्पेक्टर गुरुङलाई हिरासतमा लिएर थप अनुसन्धान अगाडि बढाएको ललितपुर प्रहरीले जनाएको छ ।