काठमाडौँ, ३१ साउन । भारतका विदेश सचिव विक्रम मिश्री नेपालको २ दिने औपचारिक भ्रमणका लागि आइतबार राजधानी काठमाडौँ आउँदै छन् । परराष्ट्र सचिव अमृतबहादुर राईको निमन्त्रणामा उनी नेपाल आउन लागेका हुन् । नेपाल आएर विदेश सचिव मिश्रीले प्रधानमन्त्री केपी शर्मा ओलीलाई भारत भ्रमणको निम्तो दिने छन् । यहाँ रहँदा उनले नेपालका उच्च अधिकारीहरूसँग पनि भेट गर्ने कार्यक्रम छ ।

प्रधानमन्त्री ओलीको भारत भ्रमण यही भदौ ३१ गते गर्ने तयारीमा परराष्ट्र मन्त्रालय जुटिसकेको छ । भारत भ्रमणका क्रममा प्रधानमन्त्री ओली र भारतीय समकक्षी नरेन्द्र मोदीबीच बिहारको बोधगयामा भेटवार्ता हुने स्रोतले जनाएको छ । सो अवसरमा प्रधानमन्त्री ओलीले नालन्दा विश्वविद्यालयको एक कार्यक्रमलाई पनि सम्बोधन गर्ने तय छ ।

प्रधानमन्त्री ओली चीन भ्रमणबाट फर्किएपछि भारतको औपचारिक भ्रमणमा जान लागेका हुन् । भदौ १५ र १६ गते (अगस्ट ३१ र सेप्टेम्बर १) मा बेइजिङमा आयोजना हुने शांघाई सहयोग संगठन (एससीओ) को शिखर सम्मेलनमा भाग लिएर फर्किएपछि उनी भारत भ्रमणमा जाने भएका हुन् ।

भ्रमणका क्रमका २ देशका सचिवबीच नेपाल–भारत साझेदारीका विभिन्न पक्षका साथै कनेक्टिभिटी’, विकास सहयोग र पारस्परिक हितका विविध विषयमा केन्द्रित रहेर छलफल हुने परराष्ट्र मन्त्रालयले जनाएको छ ।

यसैबीच, भारतीय विदेश मन्त्रालयले एक विज्ञप्ति जारी गर्दै भारतले आफ्नो ‘छिमेकी पहिलो’ नीतिअन्तर्गत नेपालसँगको सम्बन्धलाई उच्च प्राथमिकता दिएको जनाएको छ ।

‘भारत र नेपालबीच सशक्त तथा मैत्रीपूर्ण सम्बन्ध रहेको छ, जसले हालका वर्षहरूमा विभिन्न सहयोगका क्षेत्रमा ठोस प्रगति हासिल गरेको छ,’ विज्ञप्तिमा भनिएको छ, ‘आफ्नो ‘छिमेकी पहिलो’ नीतिअन्तर्गत भारतले नेपालसँगको सम्बन्धलाई उच्च प्राथमिकता दिएको छ । विदेश सचिवको आसन्न भ्रमणले दुबै देशबीच नियमित उच्चस्तरीय आदानप्रदानको परम्परालाई निरन्तरता दिने छ र द्विपक्षीय सम्बन्धलाई अझ प्रगाढ बनाउने अवसर प्रदान गर्ने छ ।’

भारतीय विदेश सचिव मिश्री गत वर्ष पनि नेपाल भ्रमणमा आएका थिए । उनले २ दिनमै राष्ट्रपति रामचन्द्र पौडेल, प्रधानमन्त्री ओली, ३ पूर्वप्रधानमन्त्रीहरू शेरबहादुर देउवा, माधवकुमार नेपाल र पुष्पकमल दाहाल प्रचण्डलाई मात्रै होइन २ उपप्रधानमन्त्री प्रकाशमान सिंह श्रेष्ठ र विष्णु पौडेल, २ मन्त्री परराष्ट्रमन्त्री आरजु राणा देउवा र गृहमन्त्री रमेश लेखकलाई छुट्टाछुट्टै भेट्न भ्याएका थिए ।