काठमाडौँ, २९ साउन । परराष्ट्र मामिलाका जानकारले बहुध्रुवीय विश्वमा शक्ति विभिन्न केन्द्रहरूमा विभाजित हुने र प्रतिस्पर्धा अझ जटिल बन्ने भएकाले अवसर तथा जोखिम एकैसाथ आउने धारणा व्यक्त गरेका छन् ।

परराष्ट्र मामिला अध्ययन प्रतिष्ठानले बुधबार यहाँ अपेक्षा शाहद्वारा लिखित ‘बहुध्रुवीयता व्यवस्थापनमा साना राज्यको क्षमता : नेपालको अध्ययन’लाई प्रचारप्रसार गर्ने उद्देश्यले आयोजना गरेको कार्यक्रममा उनीहरूले अहिले मानिस तीव्र र गहिरो रूपान्तरणको समयमा बाँचिरहेका उल्लेख गर्दै शक्ति संरचनाका विभिन्न केन्द्रहरूको उदय, आर्थिक परिदृश्यमा हुने परिवर्तन र भूराजनीतिक तथा भू–आर्थिक गतिशीलताले साना वा ठुला सबै राष्ट्रहरूले सञ्चालन गर्नुपर्ने वातावरणलाई पुनः परिभाषित गरिरहेको बताएका हुन् ।

अध्ययनमा दक्षिण एसियाका साना देशहरूले कसरी आफ्नो राष्ट्रियस्तरलाई अगाडि बढाउँदै उदाउँदो बहुध्रुवीयतामा आफ्नो राष्ट्रिय विकास, विदेश नीतिमा आत्मसात गरिरहेकालगायत विषय समेटिएको छ ।

कार्यक्रममा पूर्वसचिव दुर्गाप्रसाद भट्टराई, परराष्ट्रविद् डा. लीला न्याइच्याई र राजनीतिक विश्लेषक डा.चन्द्रदेव भट्टले ‘बहुध्रुवीयता व्यवस्थापनमा साना राज्यका क्षमताः नेपालको अध्ययन’ विषयमा आ–आफ्ना धारणा व्यक्त गरे । उनीहरूले बहुध्रुवीय विश्वमा शक्ति विभिन्न केन्द्रहरूमा विभाजित रहेका र प्रतिस्पर्धा अझ जटिल बनेको उल्लेख गर्दै यसमा अवसर तथा जोखिम एकै साथ आउने बताए ।

त्यस्तै सरकारका पूर्वमुख्यसचिव वैकुण्ठ अर्यालले ‘परिवर्तनशील विश्वव्यापी सन्दर्भमा नेपालको आर्थिक परिदृश्य’ विषयक प्रस्तुति गरेका थिए । प्रतिष्ठानका कार्यकारी निर्देशक प्रकाशकुमार सुवेदीले अध्ययनले नेपालले अहिलेसम्म बहुध्रुवीय विश्वमा कसरी मार्गचित्र तय गरेको छ र भविष्यमा अझ प्रभावकारी रूपमा के गर्न सकिन्छ भन्नेबारे आलोचनात्मक अध्ययन गर्न मद्दत पु¥याउने बताएका थिए ।