काठमाडौँ, २८ साउन । प्रधानमन्त्री केपी शर्मा ओलीले बुधबारको प्रतिनिधिसभा बैठकमा सम्बोधन गर्दैै सरकारले गरेका कामको फेहरिस्त प्रस्तुत गरेका छन् । उनले आफ्नो तुर्कमेनिस्तान भ्रमणदेखि समसामयिक राजनीतिक विषयवस्तुसम्मका विषयलाई सम्बोधनमा समेटे ।

प्रधानमन्त्री ओलीले अदालतमा पुर्पक्षका लागि थुनामा रहेका एक व्यक्तिमाथि प्रतिशोध साधेको हो ? भन्दै प्रश्न गरे । उनले सहकारी प्रकरणमा रूपन्देहीको कारगारमा थुनामा रहेका राष्ट्रिय स्वतन्त्र पार्टीका सभापति रवि लामिछानेको नाम नलिई उनीमाथि व्यंग्य गरेका हुन् । प्रधानमन्त्री ओलीले भिडद्वारा कुनै एक अभियुक्तलाई पुर्पक्षका लागि थुनामा राखिएका आधारमा न्यायको हत्या गरेर अभियोगमुक्त हुन खोज्नेहरूबाट समयले यसको जबाफ सधैँ माग्ने बताए । उनले भिडको पछि लागेर कुद्ने भिड अचम्मको मात्र होइन, दयालाग्दो पनि भएको टिप्पणी गरे ।

‘लाखौँ जनताले सहकारीमा गरेको वचत हिनामिना गर्ने सयौँ व्यक्तिमाथि न्यायालयमा मुद्दा चलेको छ । अदालतले मुद्दा हेरिरहेको छ । पूर्वमन्त्री, पूर्वसांसद, बहालवाला मेयरलगायत विभिन्न ओहोदामा रहिसकेका दर्जनौँ व्यक्तिलाई अदालतले थुनामा पठाएको छ । तर अदालतले पुर्पक्षका लागि थुनामा पठाएका कुनै एक व्यक्तिमाथि ‘राजनीतिक प्रतिशोध’ भएको भन्ने जबर्जस्त भाष्य बनाउन खोजिएको छ,’ उनले प्रश्नात्मक शैलीमा भने, ‘एउटा व्यक्तिमाथि प्रतिशोध भएको हो भने थुनामा रहेका अन्य व्यक्तिमाथि के भएको हो ? त्यो चाहिँ कानुनी कारबाही हो ? अर्बाैं रुपैयाँ अपचलन गरेको आरोपमा थुनामा रहेका सयौँमध्ये कुनकुन व्यक्तिमाथि ‘प्रतिशोध’ भएको हो ? कुन कुन व्यक्तिमाथिको थुना जायज हो ?’

प्रधानमन्त्री ओलीले यस्ता कुरालाई लिएर लगातार संसद् अवरुद्ध गरी विस्मयकारी, भावनात्मक र हानिकारक उत्तेजनाको एकालापमा मुलुकलाई लैजानु कदापि उचित नहुने बताए । उनले स्वतन्त्र न्यायालयले गर्ने निर्णय सरकार अनुकूल वा प्रतिकूल जेसुकै भए पनि त्यसमा सरकारको हात नहुने स्पष्ट गर्दै संसद्, सरकार, न्यायालयलगायत आफ्नो काम गर्नुपर्ने लोकतान्त्रिक प्रणालीका सबैजसो अंगहरूलाई पेसेवर ‘मास म्यानुपुलेसन’को आक्रमणबाट बचाउनुपर्नेमा जोड दिए ।

प्रधानमन्त्री ओलीले आफू नेतृत्वको सरकार बनेपछि भएपछि विकास निर्माणका कामको गति लिएको दाबी गरे । ‘मेरो नेतृत्वमा सरकार गठन भएपछि विकास निर्माणका कामको गतिमा कस्तो परिवर्तन आयो, म यस विषयमा उल्लेख गर्न चाहन्नँ । विगतको सरकारको काम गर्ने गति कस्तो थियो र अहिलेको सरकारको कस्तो छ, सार्वजनिक तथ्यका आधारमा आफैँ विष्लेषण गर्न माननीयज्यूहरूलाई आग्रह गर्दछु,’ उनले भने ।

सम्बोधनका क्रममा प्रधानमन्त्री ओलीले छिमेकी मुलुकहरूसँगको सम्बन्धलाई सरकारले उच्च प्राथमिकतामा राखेको बताए । ‘सरकारले छिमेकी मुलुकहरूसँगको सम्बन्धलाई सरकारले उच्च प्राथमिकतामा राखेको छ । मैले सरकारको नेतृत्व लिएपछि गरेको मित्रराष्ट्र चीन र थाइल्यान्डको औपचारिक भ्रमण तथा विमस्टेकको छैटौँ शिखर सम्मेलन, विकासका लागि वित्तसम्बन्धी चौथो संयुक्त राष्ट्रसंघीय सम्मेलनमा भएको सहभागिताबारे यस सम्मानित सदनमा जानकारी गराइसकेको छु,’ उनले थपे, ‘यसका अतिरिक्त परराष्ट्र मन्त्रीद्वारा भएका विभिन्न देशका भ्रमण र बहुपक्षीय फोरममा भएको सहभागिता तथा विभिन्न मन्त्री तथा मन्त्रालयका अधिकारीद्वारा भएको भ्रमण÷सहभागिताले नेपालजस्ता देशका चासो, मुद्दा र आवाजहरू अन्तर्राष्ट्रिय फोरमहरूमा उठाउने र नेपाललाई क्षेत्रीय तथा विश्वस्तरीय मञ्चमा चिनाउने काम भएको छ ।’

प्रधानमन्त्री ओलीले वर्तमान सरकार ‘समृद्ध नेपाल सुखी नेपाली’ को राष्ट्रिय आकांक्षा हासिल गर्ने संकल्पकासाथ अघि बढिरहेको उल्लेख गरे । ‘वर्तमान सरकार ‘समृद्ध नेपाल सुखी नेपाली’ को राष्ट्रिय आकांक्षा हासिल गर्ने संकल्पकासाथ अघि बढिरहेको छ,’ उनले थपे, ‘देशका विभिन्न भागमा आएका बाढी पहिरो, खडेरी जस्ता विपत्तिहरूका बावजुदमाथि उल्लेख गरिएका आर्थिक तथा सामाजिक विकासका सूचकहरूमा आएको सकारात्मक परिवर्तनले मुलुक सुशासन र समृद्धिको दिशातर्फ उन्मुख भएको स्पष्ट संकेत गर्छ ।’

प्रधानमन्त्री ओलीले आफू नेतृत्वको सरकारले एक वर्षको समयमा जनताका आशा र अपेक्षा पूरा गर्न हरसम्भव प्रयास गरेको पनि दाबी गरे । ‘वर्तमान सरकारले १ वर्षको समयमा जनताका आशा र अपेक्षा पूरा गर्न हरसम्भव प्रयास गरेको छ,’ उनले भने, ‘आर्थिक वर्ष २०८२÷०८३ का लागि सार्वजनिक गरिएको नीति तथा कार्यक्रम र वजेटको प्रभावकारी कार्यान्वयन गर्दै सरकार आर्थिक समृद्धि, सामाजिक न्याय र सुशासनको लक्ष्य प्राप्तिका लागि काम गरिरहेको पुनः दोहो¥याउँदै आफ्नो भनाइ अन्त्य गर्दछु ।’

संसद्लाई सम्बोधन गर्दै प्रधानन्त्री ओलीले बहुविवाहलाई मान्यता नदिइने स्पष्ट पारे । उनले सरकारको कानुन ल्याउन लागिएको भन्ने हल्लामा सत्यता नभएको स्पष्ट गर्दै लोकतन्त्रका लागि लडेर आएका आफूहरूले यस प्रकारको कानुनको कल्पना पनि गर्न नसक्ने बताए ।

प्रधानमन्त्री ओलीले बिथोलिएको राजनीतिलाई लयमा फर्काउने गरी ठुला दल नेपाली कांग्रेस र नेकपा (एमाले) मिलेर सरकार बनाएको प्रष्ट्याए । उनले बुधबार संसद्मा उछालिएका कतिपय विषय राष्ट्रिय प्राथमिकता र आवश्यकतामा आधारित नभएको टिप्पणी गरे । देश र जनताको हितमा केन्द्रित रहेर काम गर्नुपर्ने यस सम्मानित सदनलाई झुठा कथा सिर्जना गरेर ‘कन्फ्युजन’ पैदा गर्ने र सोसल मिडियाका लागि कन्टेन्ट उत्पादन गर्ने थलो बनाउने दुष्प्रयास भइरहेको प्रधानमन्त्री ओलीको भनाइ थियो । अस्थिरताको जतिसुकै चाहना राखे पनि आगामी २०८४ सालको निर्वाचनसम्म यही राजनीतिक समीकरण अगाडि बढ्ने उनले पुनः दोहो¥याए ।

प्रधानमन्त्री ओलीले भिजिट भिसामा गएर फर्किएकाले अर्कालाई भिजिट भिसामा गएको भन्दै प्रश्न गरिरहेकोमा आक्रोशसमेत पोखे । ‘कतिसम्म भने भिजिट भिसामा विदेश गएर उतैको नागरिकता लिएर, उताको नागरिकता नत्यागी नेपाल फर्केर मन्त्रीसम्म भएका प्रमाणित अभियुक्तहरू र भिजिट भिसामा गएर उतै २–२ पटक बिहे गरिसकेका व्यक्तिहरूले समेत अन्तर्राष्ट्रिय विमानस्थलमा प्लेन चढ्ने सबै नागरिकलाई ‘बेचिएको’ भन्ने भाष्य स्थापित गर्न खोजिरहेका छन्,’ उनले थपे, ‘यसका पछाडि मुलुक र नागरिकको हित जोडिएको छैन, यसले इमोसनल ब्ल्याकमेलिङमार्फत आफ्नो स्वार्थको रोटी सेक्ने प्रवृत्ति मात्र उजागर गरेको छ ।’