लन्डन, २८ साउन । नेपाल विद्युत प्राधिकरणका पूर्वकार्यकारी निर्देशक कुलमान घिसिङले राजनीतिक हस्तक्षेपबीच कर्मचारी र व्यवस्थापनको चुनौती पार गरेर नतिजा दिन सकिएको दाबी गरेका छन् ।

अमेरिकाको २ साता लामो भ्रमण सकेर बेलायत पुगेका घिसिङले लन्डनमा एक कार्यक्रमलाई सम्बोधन गर्दै आफ्नो कार्यकालमा घाटामा रहेको प्राधिकरणलाई नाफामा लगेर अहिले आयातभन्दा निर्यात ५ अर्ब रुपैयाँ बढी भएको बताएका हुन् ।

उनले भने, ‘४ महिना कार्यकाल बाँंकी छंदै कार्यसम्पादन मूल्यांकनमा शून्य दिएर सरकारले मलाई बर्खास्त गरेपनि देशविदेशबाट सम्मान, माया सद्भाव पाएको छु त्यही नै मेरो सम्पत्ति हो ।’ उनले अहिले उज्यालो नेपाल अभियान लिएर प्रवासमा रहेका नेपालीलाई जोड्न भ्रमणमा निस्किएको बताए ।

अभियानको मुख्य उद्देश्य नेपालमा समृद्धिको खाका कोर्ने, दोस्रो देश विदेशमा नेटवर्किङ विस्तार र तेस्रो राम्रो पोलिटिकल लिडरसीप टिम जन्माउने रहेको उनले प्रष्टयाए ।
घिसिङलाई सोमबार हिथ्रो विमानस्थलमा एनआरएनए युके, तमु धीं युकेलगायत विभिन्न संघसंस्थाका प्रतिनिधिले स्वागत गरेका थिए ।

नेपाललाई संसारभर गोर्खाज् भनेर चिनाउने समुदायमाझ उभिन पाउँदा आफू गौरवान्वित भएको बताउँदै उनले झण्डै २० वर्षपछि बेलायत आउन पाउँदा पाएको माया र सद्भावप्रति आभार व्यक्त गरे ।
कार्यक्रमका सभापति तमु धीँ युके अध्यक्ष जुमकाजी गुरुङले घिसिङले सुरु गरेको उज्यालो नेपाल अभियानको सफलताको कामना गर्दै देशलाई उज्यालोतर्फ अघि बढाउने उनको आकांक्षा साकार बन्ने विश्वास व्यक्त गरे ।

कार्यक्रममा वरिष्ठ उपाध्यक्ष परशु गुरुङले स्वागत मन्तव्य दिएका थिए भने महासचिव डा. विशाल गुरुङले घिसिङले कार्यक्रम सञ्चालन गरेका थिए ।

यता, बेलायतमा एनआरएनए युकेका दुवै समूहले घिसिङसँग छुट्टाछुट्टै अन्तरक्रिया गर्ने तयारीमा छन् । राजेन्द्र पुडासैनी नेतृत्वको एनआरएनए युकेले शुक्रबार (१५ अगस्ट) दिउँसो प्लमस्टेडस्थित गोर्खा क्याप्रिकनमा अन्तरक्रिया राखेको छ भने सोही दिन साँझ प्रेम गाहा मगरले नेतृत्व गरेको एनआरएनए युकेले अल्डरसटस्थित एम्पायर हलमा ‘मिट एन्ड ग्रीट’ कार्यक्रम राखेको छ ।

उनलाई सोही अवसरमा नागरिक अभिनन्दन पनि गरिनेछ । उनी २४ अगष्टमा तमु धीं युकेले आयोजना गर्न लागेको १६ औँ नेपाली मेलामा विशिष्ट पाहुनाको रुपमा सहभागी हुनेछन् ।

त्यस्तै उनले स्कटल्यान्डको भ्रमण गर्नुका साथै विभिन्न संघसंस्थाद्वारा आयोजित कार्यक्रमलाई सम्बोधन गर्ने छन् । उनले युरोपका केही मुलुकको पनि भ्रमण गर्ने कार्यक्रम रहेको उनको सचिवालयले जनाएको छ ।