काठमाडौँ, २८ साउन । नेपाली कांग्रेसको आन्तरिक विवादबीच बाग्मती प्रदेशका मुख्यमन्त्री इन्द्रबहादुर बानियाँले प्रदेशसभाबाट विश्वासको मत पाएका छन् ।

मंगलबार प्रदेशसभामा भएको मतविभाजनमा उनको पक्षमा ६३ मत प्राप्त भएसँगै उनले विश्वासको मत पाएका हुन् । ११० मध्ये ९२ जना प्रदेशसभा सदस्य बैठकमा उपस्थित रहेकोमा विपक्षमा २२ मत प्राप्त भएको थियो ।

बानियाँले नेपालको संविधानको धारा १६८ को उपधारा (४) तथा प्रदेश सभा नियमावली, २०७४ को नियम १४३ को उपनियम (१) बमोजिम विश्वासको मत पाएका हुन् । कांग्रेसका प्रदेश सभा सदस्य बानियाँ २० साउनमा मुख्यमन्त्री नियुक्त भएका थिए ।

कांग्रेस र एमाले गठबन्धनका बानियाँ साउन २० गते बानियाँ मुख्यमन्त्री बनेका थिए । तर कांग्रेसभित्रै निवर्तमान मुख्यमन्त्री बहादुरसिंह लामा पक्षधर १४ सांसद असन्तुष्ट भएपछि मंगलबार दिउँसो ४ बजेलाई तोकिएको विश्वासको मत लिने तालिका पछि सरेको थियो ।