काठमाडौँ, २७ साउन । प्रधानमन्त्री एवं नेकपा (एमाले)का अध्यक्ष केपी शर्मा ओलीले मदन भण्डारी फाउन्डेसन पार्टीले नबनाएको बताएका छन् ।

सोमबार पार्टी केन्द्रीय कार्यालय च्यासलमा आयोजित मदन–आश्रित स्मृति प्रतिष्ठान शपथ कार्यक्रमलाई सम्बोधन गर्दै उनले कतिपय नेताका नामका प्रतिष्ठानहरू सामूहिक हुनुपर्नेमा जोड दिए ।
ओलीले पूर्वराष्ट्रपति विद्यादेवीलगायत पाउन्डेसनका पदाधिकारीको अभिव्यक्तिप्रति असन्तुष्टि जनाए । प्रतिष्ठानका प्रमुख संरक्षकसमेत रहेका उनले स्थापित नेताको सम्मानमा खोलिएका र पार्टीसँग जोडिएका प्रतिष्ठान र संस्थाहरू ठगी खाने भाँडो हुन नहुने स्पष्ट पारे ।

‘मदन–आश्रित स्मृति प्रतिष्ठान तत्कालीन महासचिव मदन भण्डारी र तत्कालीन संगठन विभाग प्रमुख जीवराज आश्रितको निधनपछिको शोकको घडीमा जनताको बहुललीय जनवाद (जबज)को वैचारिकतालाई अगाडि बढाउन २०५० जेठ ९ गतेको पार्टी निर्णयबाट खोलिएको हो,’ उनले भने, ‘पछि पार्टीले मदन जयन्ती मनाउने सन्दर्भमा पनि पर्याप्त ध्यान नदिएको अवस्थामा व्यक्तिगत आधारमा मदन भण्डारी फाउन्डेसन खोलिएको थियो । अहिले फाउन्डेसन गतिविधि र यसको नेतृत्वले आन्दोलनप्रति निष्ठा देखाउन छाडेको छ । यस्ता संस्थाहरू पार्टीसँग निष्ठावान् हुनुपर्छ । पार्टी हित विपरीत प्रयोग हुनुहुँदैन ।”

मदन भण्डारी फाउन्डेसनको संरक्षक पूर्वराष्ट्रपति भण्डारी छिन् भने अध्यक्ष उनकी छोरी उषाकिरण भण्डारी छन् । सोही कार्याक्रममा एमाले अध्यक्ष ओलीले मदन–आश्रित स्मृति प्रतिष्ठानका नवनिर्वाचित अध्यक्ष प्रदीप ज्ञवालीलाई पद तथा गोपनीयताको शपथ गराए ।

प्रतिष्ठानको केही दिनअघि सम्पन्न साधारणसभाले एमालेका उपमहासचिव ज्ञवालीलाई अध्यक्ष पदमा निर्वाचित गरेको थियो ।