काठमाडौँ, १८ साउन । बागमती प्रदेशका मुख्यमन्त्री बहादुरसिंह लामाले आफ्नो पदबाट राजीनामा दिएका छन् । उनले आइतबार हेटौँडामा पत्रकार सम्मेलन गरेर राजीनामा दिएका हुन् ।

नेपाली कांग्रेस र नेकपा एमालेको गठबन्धनको सरकारमा कांग्रेसबाट नेतृत्व गर्दै लामाले गत वर्ष साउन ८ गते मुख्यमन्त्रीमा नियुक्त भएका थिए । गत वर्ष साउन ९ गते मुख्यमन्त्री पदको शपथ लिएका लामा ३७४ दिन मुख्यमन्त्रीमा बने ।

पत्रकार सम्मेलनमा मुख्यमन्त्री लामाले शक्ति केन्द्र र स्वार्थ समूहको इशारामा चल्न नसकेका कारण राजीनामा दिनुपर्ने अवस्था आएको बताए । उनले संविधानत आफूले राजीनामा दिनुपर्ने अवस्था नरहेको भन्दै आगामी सरकारलाई सहयोग गर्ने प्रतिबद्धता जनाए ।

कांग्रेस बागमती प्रदेश संसदीय दलको नेतामा पराजित भएपछि मुख्यमन्त्री लामामाथि मुख्यमन्त्री पदबाट राजीनामा दिन दबाब परेको थियो ।

मुख्यमन्त्री लामा इन्द्रबहादुर बानियाँसँग संसदीय दलको नेतामा पराजित भएका थिए ।