काठमाडौँ, ३ साउन । नेकपा एकीकृत समाजवादी र नेकपा राष्ट्रिय एकता अभियानबीच पार्टी एकता घोषणा भएको छ ।

साउन २ गते राष्ट्रिय सभागृहमा आयोजित कार्यक्रममा दुई पार्टीबीच एकताको घोषणा भएको हो । यससँगै नेकपा राष्ट्रिय एकता अभियानका अध्यक्ष वामदेव गौतम अब एकीकृत समाजवादीको वरिष्ठ नेता बनेका छन् ।

दुई पार्टीका अध्यक्षहरू माधवकुमार नेपाल र गौतमबीच गत हप्ता पार्टी एकता गर्ने सहमतिपत्रमा हस्ताक्षर भएको थियो ।

एकीकृत समाजवादीमा गौतमलाई वरिष्ठ नेताको जिम्मेवारी दिने त्यतिबेलै सहमति भएको थियो । सोहीअनुसार सभागृहमा एकता घोषणा भएको हो ।

एकीकृत समाजवादीमा गौतम अध्यक्ष नेपाल र सम्मानित नेता झलनाथ खनालपछि तेस्रो वरियतामा रहनेछन् । नेकपा एमालेले बेवस्ता गरेपछि नेता गौतमले एकीकृत समाजवादीसँग एकता गर्न पुगेका हुन् ।